Муаррифии китоби "Ҳамқадами соҳа"

Муаррифии китоби "Ҳамқадами соҳа"

15 сентябри соли 2023, 14:25 Дида шуд 121

Муаррифии  китоби  “Ҳамқадами  соҳа”

       Бо  мурури  замон  ҳама  мавҷудоти  олам  тағийр  ёфта,   шакли  худро  дигар  мекунанд.  Одамизод  метавонад  ба  воситаи  имкониятҳои  дастрас   умри  ин  мавҷудотро  дароз  кунад.   Дар  навбати  худ ин  барои  аниқ  ва дақиқ  таҳлил  намудани  руйдодҳои  таърихӣ  нақши  муҳим  мебозад.  Яке  аз  ин  имкониятҳо ба  воситаи  навиштаҷот  дар  шакли   китоб  ҷамъоварӣ  намудани  маълумотҳои  зарурӣ  дар  бораи  ин  ё  он  воқеаи  таърихӣ,  корхонаю  ташкилотҳо ва  шахсоне, ки   барои  ватани  худ,  барои  халқи  худ  содиқона  хизмат намудаанд,  мебошад.  Бо  ҳамин  васила,   дар  ҳолати  дуруст  нигоҳ  доштани  онҳо, мо  метавонем барои  наслҳои  оянда   ин  маълумотҳоро  умри  садсолаҳо  бахшем. 

        Аз  ҳамин  лиҳоз,  роҳбарияти   Хадамоти   назорати  давлатии  энергетикӣ  тасмим  гирифт, ки   дар  бораи  яке  аз  ниҳодҳои  зарурии  соҳаи  пешбарандаи  хоҷагии  халқи  мамлакат – мақоми назорати давлатии соҳаи  энергетика  рисолае  омода  намояд. Зеро  ҳамагон  медонем, ки  соҳаи  барқ    хусусиятҳои  ба  худ  хосро  дорад.  Агар мо энергияи  барқро  аз  марҳилаи  истеҳсол,  интиқол, тақсимот  ва   истифодабарӣ  пайгирӣ  намоем,  бисёр  нозукиҳои  онро  дармеёбем,  ки  ба  инобат  нагирифтани  онҳо  метавонад  ба оқибатҳои  нохуш  расонанд.   Ҳамаи  инро  ба  таври  одилона  ва  беғаразона  ошкор  намудан  ва  барои ислоҳ  пешниҳод  намудан  ва  бо  ҳамин  восита  пешгирӣ  намудани  ҳодисаҳои  пешбининашаванда сохтори  махсус   -  Хадамоти  назорати  давлатии  энергетикӣ  ташкил  карда  шудааст. Ҳаёт  собит  сохтааст, ки  сохторҳое, ки  ба  истеҳсол,  интиқол,  тақсимот  ва  истифодабарии  энергияи  барқ  сару  кор  доранд,  на  ҳама  вақт  камбудиҳои  худро   ошкоро  эътироф  мекунанд.  Азбаски  Хадамоти  назорати  давлатии    энергетикӣ  мақоми ҳокимияти  иҷроияи давлатӣ  мебошад, бояд фаъолияташ шаффофу  беғаразона  бошад,  бояд  санҷишҳои  гузаронидашаванда дар  асоси  санадҳои  меъёрии  ҳуқуқӣ  ба  роҳ  монда  шаванд.  Барқчиёнро  барои  фаъолияташон   барҳақ таърифу  тавсиф  мекунанд, вале   ҳиссагузории   кормандони  Хадамот  аз  мади  назар дур  мемонад,  то  ҳатто  дар  баъзе  мавридҳо бо  назари  гарм  ба  онҳо нигоҳ  намекунанд.  То  андозае  фаъолияти  мо  аз  назари  омма  дур  аст.

       Муаллифи  китоб  сардори  Хадамоти  назорати  давлатии  энергетикӣ  Ғолиб  Убайдуллозода мебошад.  Дар  омода  намудани  китоб  мутахассис- машваратчӣ Ҷура  Бобоев  ва  муовини  сардори  Хадамот  Даврон  Исҳоқӣ  саҳми назаррас  гузоштаанд. Ҳаҷми  умумии  китоб  бо  расмҳо  250  саҳифаро  ташкил  медиҳад. Ҳамаи  гуфтаҳои   болоро  ба  назар  гирифта, ҳайати  таҳририя бо  дастгирии  роҳбарияти Хадамот   тасмим  гирифтанд, ки  таърихи    Хадамотро  аз  рӯзи  ташкилшавӣ  то   ҳозир ба  тартиби  хронологӣ дар  китоби бо  номи  “Ҳамқадами  соҳа”  рӯи  қоғаз  биёранд.  Номи  китоб  ҳам   мувофиқ    интихоб  карда  шудааст.  Зеро  назди ҳамаи  кормандони  соҳа  як  вазифа  истодааст,  ин  ҳам  бошад оқилона,  сарфакорона бо  риояи  ҳама   талаботу  қоидаҳои  бехатарӣ истифода  бурдани  энергияи  барқ  мебошад.  Дар  китоб  ҳамаи  онҳое, ки дар саргаҳи  ин  сохтори  муҳими  давлатӣ  буда, дар  фаъолияти  он  саҳми  арзанда  гузоштаанд,  аз  рӯи  имкониятҳои  мавҷуда  ёдовар  шудаанд. Қобили  зикр  аст, ки  дар  китоб  номи  зиёда  аз  ҳафтсад  нафар  кормандони  Хадамот  оварда  шуданд.  Ба  ҳар як  шуъба  ва  раёсат  саҳифаҳои  алоҳида  бахшида  шудааст.   Бечунучаро  китобро  боби алоҳида  бо  сарлавҳаи  “Аксҳо  қисса  мекунанд”  мазмуни  тоза  бахшида,  диққати  хонандаро   барои  хондан  ҷалб  мекунад.  Як  нуқтаи ҷолиб ин аст, ки дар  давоми  мавҷудияти  Хадамот  дар баробари мардон онро  се  нафар  зан   -  Атаҷонова  Светлана Матясовна,  Хоҷаева  Уғулой  Тиллоевна  ва  Мавҷуда  Холиқзода  дар умум 26  сол роҳбарӣ  намудаанд.  Умуман  дар  китоб  боз  бисёр  далелу  рақамҳо  оварда  шудаанд. То  чӣ  дараҷа  мо  онҳоро  тавонистем  дар  китоб  содаву  фаҳмо дарҷ  намоем,  инро   хонандагони  муҳтарам   баҳо  хоҳанд дод.   Албатта  кор  бе  камбудӣ  намешавад, аз  ҷумла    китоби  нашркардаи  мо  низ аз камбудӣ орӣ нест.   Ҳама  фикру  андешаҳои  хонандагонро мо  бо  камоли  эҳтиром  қабул менамоем  ва  онҳоро  дар фаъолияти  ҳаррӯзаи  Хадамот  истифода  мебарем.  Дар  омода  намудани  китоб ҳамаи  шуъбаю  раёсатҳо  ва  кормандони  алоҳида  фаъолона  иштирок  намудаанд, ки ба  ҳамаи  онҳо  изҳори  миннатдорӣ  менамоем. 

      Дар  таърихи  Хадамот  ин  аввалин рисола  дар  шакли  китоб  мебошад, ки  ба  тасвиб  расид.  Дар  Хадамот  ҳастанд  шахсоне, ки  соҳаро  хуб  медонанд ва  завқи    навиштан  доранд.  Марҳамат  мо  омода  ҳастем  онҳоро низ дастгирӣ  намоем,  то  ки  тавонанд  фаъолияти  минбаъдаи  Хадамотро боз  ҳам  пурмазмуну  ҷолиб инъикос  намоянд.

      Теъдоди нашри китоб  300  ададро ташкил медиҳад.  Китоб  ба  ҳама  раёсату  шуъбаҳо, собиқадорони  Хадамот,  Вазорати  энергетика  ва  захираҳои  оби  Ҷумҳурии  Тоҷикистон,  сохторҳои  системаи  энергетикӣ  ва  шахсони  алоҳида  дастрас  гардонида  шудааст.

      Китоби мазкур ба  кормандони  соҳаи  энергетика  ва  доираи  васеи  хонандагон  тавсия  дода  мешавад.